Prošli tjedan nisam baš na dnevnoj bazi pratil kaj se događa v našem kvartu jer sam ležal bolestan, tak da sam tek jučer malo škicnul na portale. I vidim da su se svi hapili našeg narodnog zastupnika Leda Ledinskog jer je svoj mandat skroz prečkomel. V Saboru ni rekel ni reč, nijemput ni zišel za govornicu il uključil mikrofona kaj mu je pred nosom v klupi. I onda svi pitaju da zakej ga narod plača 16 kila mesečno, isto ko i Stipicu Milinkovića, koji je v Saboru govoril više od 500 put.
A onda je Ledo rekel zakej se zapravo celo vreme tak ponašal. Nije to bila, kajaznam, lenost, bezidejnost, nezainteresiranost il neka slična svinjarija. Reč je o znanstvenom istraživanju, eksperimentu.
– Htio sam dokazati da je šutnja uistinu glasnija od verbalnih ekshibicija. Njome se može puno više reći – objasnil je narodni zastupnik, po struci psiholog. To su vam oni kaj vas gledaju i slušaju, pa vam onda vele jeste li normalni il poremećeni.
Da je šutnja zbilja zlata vredna, kak se veli i v poslovici, osobno sam skužil još v osnovnoj školi. Maks i ja nismo ni zucnuli kad je učiteljica pitala da ko je razbil teglu z cvećem s prozora. Stvar nije do kraja hodala jer Ivana z prve klupe ni šutela, pa smo frend i ja ipak nahebali.
Z Ledovom taktikom služe se i drugi. Recimo, članovi Podravkinog nadzornog odbora iz doba Spajsa, barem tak veli Šestak v svojoj obrani. Tumači kak su sve ono kaj su dečki delali da se, kao, obrane od neprijateljskog preuzimanja onih Norvežana, delali su tak da su baš svi znali i kaj se to i kak se dela. A na sudu se niko od nadzornjaka ničega ni sečal. Šuteli su ko Ledo. Šestak veli da je to zato kaj i sami ne bi došli pod udar Uskoka ko članovi ekipe kaj je muljarila z firminim penezima i dionicama. Morti bi čak morali vrnuti naknade kaj su ih deli v žep, a reč je o zbilja lepim nofcima. Ovak, zahvaljujući gromoglasnoj šutnji, dečki koji su nadzirali firmu dok je z nje scurelo, kak vele tužitelji, oko 400 milja kuna, i dalje nadziru tu istu firmu, a neki su još i napredovali.
Napreduje i naša Koprivnica, i to na polju eliminiranja ugljičnog dioksida. Vidim da su prošli tjedan došli i autobuščeki na struju. Moram priznat da me stvar počela zabrinjavat. Pazite, već imamo pet auteka kaj ne emitiraju ceodva, pa se furaju bicikli, kaj također ne puščaju toga plina, pak si je šef Podravke kupil Teslu, pak imamo šparne hiže, kampus bu također, vele, bezplinski… Ljudi moji, ne osečate opasnost? Pitanje je dana kad bu naša napredna gradska vlast skroz zaprla sve pipe z kojih još, fala Bogu, curi ugljični dioksid, a taj nam je plin ipak životno potreban. Bez njega nema fotosinteze. Recite vi kaj očete, al ja ne bi htel da se Koprivnica pretvori v pustinju. A svi napori gradske vlasti idu v tom smeru.
Nego, vrnimo se ekperimentu kaj ga provodi naš narodni zastupnik. Glavni alat psihologa kad delaju istraživanja jesu ankete. Valjda i Ledo ljudima planira dat upitnike da vidi jesu li razmeli kaj je on to celo vreme šutel. A da si ne bi od usta trgal kaj bi plačal tolkoga papira, iskoristimo suvremenu tehnologiju i pomognimo našem znanstveniku.