Moram se pofaliti da sam otkril metodu z kojom sam se počel služit kak bi si objašnjaval svet oko sebe. Vauuu, jebote, pa postal si filozof il pravi mudrac, samo su oni v stanju skužiti svet – rekel bu mam neko ko mi ne bi dal dovršiti to kaj sam počel. Dakle, nisam rekel da sam v stanju objasniti svet i zvizdarije koje me okružuju, neg da sam se navčil kak da si to objašnjavam i tumačim, makar to ne rezultiralo konačnim odgovorima.
Tak nečemu bi, po definiciji, recimo, trebale služit novine. Ono, da nam lepo objasne kaj se to točno dogodilo, zakej se to dogodilo i kaj to znači za nas. No, teško se danas snajti v novinama i profekat kaj je zazbiljač, a kaj je spin, kaj se zbilja dogodilo, a kaj pojedine novine drukaju da se dogodi. Da bi se v svemu tome snalazil, moraš znat ko je čiji i ko koga, a to mi je postalo prekomplicirano pratit. I nije mi više zabavno ko negda.
Do nove metode došel sam čistam slučajno. Počel sam se družit z čovekom z Norveške kaj je došel živet k nama v Koprivnicu i počeli smo se spominjat o svemu i svačemu. Kak on ne zna hrvatski, a ja norveški, spikamo na engleskom. A kad nisi maher v engleskom, ko ja, moraš dobro razmišljat kak da nekaj veliš. Ak neznaš pravu reč, onda i najbanalnije stvari ideš objašnjavat zokola i v detalje, tak da bi te razmelo i dete.
E, i tak mi je jemput novi frend pričal kak je tam gore imal dućana z kompjuterima i lepo je išlo sve dok nije došla jeftina konkurencija z istoka, pak je dućana moral zaprti. I veli mi da se onda zaposlil v nacionalnoj aviokompaniji. I normalno da ga pitam jel dugo tražil novi posel. Tri dana, veli on. Pa kak je to išlo tak brzo, pitam ga, a on me čudno gleda i baš ne razme.
– Pa otišel sam na biro za zapošljavanje i tam su me pitali kaj bi štel delati, i onda sam si odabral. Kaj vi tu nemate biro za zapošljavanje? – čudil se moj Norvežanin.
Morete si mislit kolko mi je trebalo da mu probam objasnit kak to pri nama funkcionira – da imamo, al se prek njega niko ne zapošljava, neg je kod nas glavna špaga, da imaš rođaka na poziciji il da si v nekoj partiji. Dugo je trajalo dok sam mu sve to del na vrpu, a on ipak nije do kraja razmel, al sam ja skužil da je cela priča posle toga meni jasnija i jednostavnija.
I tak je nastala moja metoda za objašnjavanje sveta. Kaj god ne razmem, idem svom norveškom frendu tumačit jednostavnim rečima, i onda stvar najemput postane kristalno jasna. Funkcionira, verujte.
Evo probajte, za vežbu, nekome ko ne razme hrvatski objasnit, kajjaznam, zakej Podravkini menadžeri dobivaju velke bonuse. U nedostatku norveških prijatelja morete se poslužiti kućnim ljubimcem, bil to pes, maček il kanarinac. Ziher sam da vas živina nebu razmela, al bute sebi sve lepo objasnili.
[total-poll id=72010]