V politiki stvari nikad nisu takve kak zgledaju na prvi pogled, a nemaju baš nikakve veze z onim kaj je službeno tumačenje. Hitler nije patološki mrzil židove zbog Protokola Sionskih mudraca, nego zato kaj je htel zatrti svoje židovske korene koje je vlekel po baki. Sanki nije otišel zbog Slovenaca, neg zato jer su ga zbog korupcije oterali Ameri i Merkelica. Tito nije vrušil onaj most v napadu vojnostrateške genijalnosti, neg je v strahu brzopleto zajebal i skoro vništil partizane skup sa sebom.
Tak je i z SDP-ovom listom za našu izbornu jedinicu. Na njoj se nije našel onaj koga su svi tam vidli i jedini kojeg je predložil gradski ogranak stranke. Ziher sam da bu službeno objašnjenje reklo da je Mišel još mlad i da je pred njim kakti još duga i plodna politička karijera. Aralica je ’67. lepo napisal da Svemu ima vreme. A to da je mesto njega vupal doministar Dražen, kojega ne trpe v gradskom SDP-u, objašnjavali buju z tim da je šef stranke Zoki zebral ljude koji su se iskazali v izvršnoj vlasti.
Na prvi pogled to i je tak, no rekli smo da stvari v politiki nisu onakve kakve zgledaju na prvi pogled. Sve treba deti v, ono, kontekst. Tu me režite ak Zokijev izbor nema baš nikakve veze z Onim-Koji-Sve-Drži-Vruki. Zakej? Pa zato jer se Zoki između velkog pulena Onoga-Koji-Sve-Drži-Vruki i čoveka koji mu je kontra odlučil za čoveka.
Moramo malo otiti v blisku povest, vu vreme kad je Dražen bil zamenik Onomu-Koji-Sve-Drži-Vruki i šef partije v Koprivnici dok je još bila monolitna. Onda se nekaj dogodilo i Dražen je, mimo šefovog znanja, otišel za doministra v Zagreb. Istodobno je z Ledom, koji ima neke odlike poznatog šahovskog velemajstora Paula Keresa (zvali su ga “večiti drugi”), osnoval pučističku skupinu kaj je trebala potkresati krila Onome-Koji-Sve-Drži-Vruki, kad je ovaj već otišel v Podravku. Rečnikom iz ’71. to bi se nazvalo pokušajem liberalizacije partije i borbom protiv dogmatskih snaga kaj su htele zadržati centralistički status quo. Projekt je, znamo, neslavno propal. Onaj-Koji-Sve- Drži-Vruki, koji dugo i dobro pamti, hametice je porazil majstore. Dražen više nije bil šef gradskog SDP-a i faktički je figuriral v lokalnom precedništvu stranke ko strano telo.
Kaj bi se stvar skroz objasnila, v priču treba deti odnos između Zokija i bivšeg Draženovog šefa. Del ga je v Podravku kaj bi se rešil napasti i opasnosti da ga se ruši ne mestu šefa stranke. To je bil plan da je Josipović ostal precednik države. A Zoki dugo i dobro pamti. I tak Onaj-Koji-Sve-Drži-Vruki zbilja još sve drži v ruki, ali samo v našem gradu, dok Zoki sve drži v ruki v državi te ima nekaj i v rukavu. A država je malo vekša od grada. I zato je Dražen na listi, a Mišel nije.
No, kak stvari zgledaju, a zbilja nije vic, ipak bi v Sabor mogel otiti jen koprivnički dogradonačelnik, zapravo dogradonačelnica. Melita je na smešnome mestu na listi, no HNS ima još jedno, koje bu osiguralo Sabor, a njega drži ministrica Mrak Taritaš. Ak crveni pobede na izborima, ona bu pak ministrica, a naša Melita bu opet promenila klupu. U samo tri lete iz osnovnoškolskih, prek sveučilišnih dočepala bu se klupa na Markovom trgu, koje osim slave i ugleda nose i 15-16 hiljadarki mesečno plus bogtepitaj kakve sve naknade. I onda vele da je v svemiru najbrža svetlost…
[total-poll id=53605]