Navčeni smo na svakakve gadarije od političara, koji svoj jedini razlog postojanja vide v tome da dojdu il ostanu na vlasti, al ovo kak su koristili jad i muku nesretnih ljudi, neda se progutati z ničim. Tražiti da vojska z tenkovima jadnicima zapreči granicu jer se, jeli, ovak ne zna ko sve ulazi v Hrvatsku, a ko zna, jeli, kolko je med njima teroristov i još bu, jeli, izbila epidemija od tih muslimanov, a osim toga ne sme ih se, jeli, tak samo puštati jer se krše, ono, schengenski režimi i dublinski protokoli – to tražiti na takav način v takvoj situaciji patri se samo moralnom pajceku. Pajcek bu pojel i vuho detetovo jer mu je želudec prazan, a moralni pajcek pojel bu svu ljudskost samo kaj bi kritiziral svoje političke protivnike da isprazni njihove fotelje za svoju rit. Fuj i bljak.
Kak sam stariji, tak am sve uvereniji v dve stvari. Prva je ta da demokracija naprosto ni sustav koji bi bil za nas. Političke stranke, izbori, trodioba vlasti – to je zmišljeno za narode čiji političari barem zericu drže do javnog interesa, a ne samo do svojega gupca, ak ni zbog čeg drugog, a onda zato jer ih javno mnijenje – ono kaj mi nemamo – strmopizdi z pozicije ak malo preveč zajebu. Toga ni pri njima nema v zakonima, to nekak funkcionira samo po sebi. Pri nama ne funkcionira nikak.
Druga stvar je biološke prirode. Došel sam do zaključka da pri nama v onima kaj postanu profesionalni političari dojde do nekakve promene v organizmu, da se zvrgne treći il peti kromosom pak onda čak i nekad pristojni i pametni ljudi postanu zveri i životinje. Ti kaj bi slali tenkove na izbeglice v datom momentu ziher bi ih poslali i na domoroce. Ak bi smetali da se dojde il ostane na vlasti.
Nego, pustimo gadarije koje političari delaju v izvanrednim okolnostima i posvetimo se svakodnevnim našim zvizdarijama. Evo, v Koprivnici imamo jednu školu koja svakodnevno dela v izvanrednim okolnostima, i tak već pet let, a o tome narod koji plaća i za tu školu i za političare koji z njom upravljaju nema pojma, a narod nema pojma jer gradska vlast skriva nered koji vlada v Podravskom suncu i za koji je sama odgovorna.
To da ne zmišljam, svedoči nalaz inspekcije Ministartsva financija, koje je još v travnju pročešljalo financijsko poslovanje Sunca i koji na Zrinskome trgu skrivaju kaj zmija noge.
“Financijski izvještaji nisu točni, istiniti i pouzdani te ne iskazuju stvarno stanje prihoda i primitaka, rashoda i izdataka, obveza, imovine i izvora vlasništva.” – napisali su onak, globalno, državni inspektori, da sad nejdemo v detalje.
Gradskoj vlasti to nikak nije novost. Sama je još prije tri lete dala napraviti internu reviziju v Suncu, pak je doznala “da u službenoj evidenciji nedostaje dokumenata”, “da ravnateljica škole nema nadzor nad zaposlenicima”, “da se u školi ne vodi zakonski propisana dokumentaciju u području nabave roba i u području financijskog poslovanja”, “da se iz dokumentacije ne može jasno utvrditi način trošenja namjenskih sredstava” i tak dalje, i tak gore.
I kaj je onda vlast koja upravlja školom napravila? Dala je ravnateljici novi mandat. A kaj je trebala napraviti? Zaštititi javni interes i smeniti upravu škole. Kaj je onda bilo? Neko je stvar prijavil Uskoku i počela je istraga. I kaj se sad dogodilo? Ravnateljica je prošli tjedan sama dala ostavku. I kaj bi se dalje trebalo dogoditi? Gradska vlast bi trebala dobiti vritnjak jer zataškava kriminal v Podravskom suncu. I jel se bu to dogodilo? Nebu. A zakej? Zato jer živimo v Hrvatskoj.