Napokon sam prošli tjedan našel tonera za svoj printer. Mali laser, ono, jeftinjola, al je noviji model pa je dosad bilo samo originalnih tonera. To su oni na koje denu poznatu firmu, pa košta triput više neg kaj vredi, dok na zamenskom toneru ne piše ništ, a dela isto. I, velim, najdem napokon firmu, jedinu v Hrvatskoj kaj ima moj toner, zamenski, popunim internetsku narudžbu i već skoro kliknem “plati”, kad, ono, ufatim krajičkom oka adresu te firme. Z Koprivnice je. Tibogara, velim, pa nebum sad išel naručivat od njih kaj mi buju slali poštom, bum si sam otišel po tonera. Tak i je i bilo, rešeno začas.
A ta naša firma – z mojeg potrošačkog rakursa najbolja v zemlji – dela v onoj beloj zgradi v Dravskoj kaj ju je gradska uprava kupila i dala Koprivničkom poduzetniku i onda se tam jeftino davaju poslovni prostori mladim poduzetnicima, početnicima, onima kojima bi bilo teško il nemoguće plaćat tržišnu najamninu. Žal mi je kaj se te koji su vnutra još malo ne zreklamira o gradskom trošku, pa im se tak još malo pomogne. Da im se, naprimer, za koji vikend daju štandovi v centru, pa nek se pokažu izvan Dravske, da Koprivničanci znaju kaj sve tam je. Slučajno sam doznal da je jen dečko tam napravil prvu profi koprivničku električnu gitaru. I sad, ko ne zna, išel bu naručivat Gibsona ili Fendera. Kaj to ne bi bilo bezveze?
Pričam svom frendu Maksu o svom toneru i o Dravskoj, pa mi on veli: – Znaš da je još Ajnštan skužil da je sve relativno. Važno je otkud gledaš na stvar. E, vidiš, ja sam ti baš friško odlučil da bum gledal s one strane koja mi paše. Nebum za Koprivnicu više pripovedal da je malo veće selo bez kazališta, v kojem Komunalac građane dere za vodu i plin kaj bi korumpirana klika na vlasti mogla financirat svoje niškoristi projekte, neg bum rekel da je to lepo sređeno mesto v kojem te niko nebu lupil po glavi dok kasno navečer ideš z najboljega kina v zemlji. A sad bum dodal i da v Koprivnici moreš nabaviti tonere kakve nigde drugde nemreš. Za onoga v Podravki više nebum trubil da je politički kadar v državnoj firmi kaj je prek noći obrnul socijalistički baloner v buržujksi kaput, neg da je naš čovek kojeg su već i v Ameriki prepoznali ko regionalnog poslovnog lidera. A maloga koji vodi grad nebum više nazival komsomolcem karijeristom, neg sposobnim mladim čovekom koji uleva poverenje, a v tome mu štangu drži iskusna i već na više frontova prokušana gradonačelnica. Tak.
– Isusebože, Maks – v hipu sam se šokiral – pa kaj se to dogodilo da TI tak pripovedaš, ti koji si navek bil kontraprotiv svega?
– Gle, stari, to ti je filozofija, čisti Kjerkegor. Ili-ili. Egzistencijalizam. Il buš povlekel konzekvence kakve sam ja povlekel, pa promenil mesto s kojega gledaš na stvari, il buš potegnul prek grane i promenil mesto generalno. Za ovo drugo sam star i imam decu, a trećega nema.
Još pod dojmom velkog Maksovog preobražaja pratil sam hidranrsku aferu, friško naše političko prepucavanje zbog požara v kojem je mlada obitelj zgubila kuću, i skužil da se Slavek Lakuš, prvi koprivnički vatrogasac, rutinski služi Maksovom fintom za opstanak. Hidranti koji su, gledajuć s pozicije vatrogasca na intervenciji, suhi ko Sahara, postaju najispravnijim hidrantima na svetu kad se na njih baci oko s pozicije vatrogasnog zapovednika, nameštenika kaj ga bira i plaća gradska uprava. Skontal je, valjda, i Slavek da je v letima v kojima se nejde prek grane.