Nekad je vredelo da se nije dogodilo ono kaj nije na televiziji. Danas vredi da nema onoga kaj nije na internetu. Ak bi v tom smislu čovek prosuđival na temelju naših službenih gradskih stranica, onda Damir Felak više ne postoji.
No, svi znate ko je bil Damir Felak. Od poznatoga ćaće sin, razmel se je i v ekonomiju i v politiku, čak je tu pri nama letima vodil jednu stranku. Zadnji put se za njega čulo lani malo posle Božića, kad je na Radiju Dravi daval izjavu iz Zagreba. Poslednje njegve zabiležene reči glasile su: “Mogu objaviti da je Sabor konstituiran i da je izabran predsjednik.”
Jel Damir Felak nestal mam posle toga, il je još jedno vreme postojal, morala bu pokazati istraga. Jedino kaj se danas zna je da ga nema tam gde bi trebal biti. Na gradskim stranicama ispod naslova “Zastupnici u Hrvatskom saboru iz Koprivnice” samo je belo. Ni žive duše. Istražiteljima bumo prepustili da skužiju jel to Damir Felak slučajno prestal postojati il je neko naredil da tak bu.
Kak bilo, meni je to nateralo strah v kosti. Mam sam krenul proveravat jel još kaj v međuvremenu naglo nestalo. A kam bi čovek išel ak ne na Vikipediju? Otprve sam našel našu Koprivnicu, i v naškoj i v engleskoj varijanti. Tu je i dalje – odahnul sam. Jedino kaj sam videl da je neki šaljivdžija v engleskoj verziji sastavljal listu važnih Koprivničancov v povesti, pa je med njih del negdašnjeg nogometaša FK Partizana i još par egzotičnih faca. Poglečte si, bute se nasmijali.
A onda, kaj drugo proveravat neg našu Podravku? Sam bogek, i dalje je tu gde treba biti. Jedino kaj bi prigovoril da je naška verzija zastarela i prestaje z 2007. godinom, al su zato detaljno opisane aktivnosti Podravkine udruge branitelja. To vam je draž Vikipedije – ko se prvi seti žvrljat, taj bu nasral kaj mu paše. Malo me čudi samo kaj se firma ne brine za takve stvari, ipak je to dio imidža, a firme od imidža žive. Pa i neki ljudi.
Morem vam reći i da na Vikipediji nisam našel nikog od naših gradskih čelnika. To je možda i dobro, ono, i ne mora se baš za njih nadaleko znati. Iovak nas investitori zaobilaze v širokom luku. Osim toga, bu se pisalo kad se bu imalo kaj pisati.
Na Vikipediji nema ni Kristine Cvitić, do jučer naše pročelnice za društvene delatnosti. Zakej je iznenada dala ostavku, tam se, tak, nemre najti, a bogme ni na celom internetu, kolko ga god ima. Niš nije jasnije ni ak se zagleda v manje virtualne stvari, poput lokalnih novina. Gospođa Cvitić ni štela ništ reći narodu koji ju je plaćal na mestu pročelnice i koji bu ju i dalje plaćal ko javnu službenicu. Kak je to zbiljam, blago rečeno, bezobrazno i odurno, a meni se bivša pročelnica navek činila pristojnom gospođom, valjda ju je neko ucenil, pa se ne ufa govorit jer joj je morti i život v pitanju. Bil bi red da se istražitelji i toga hape kad već buju tražili kam je nestal Damir Felak.
Ak je ko zbilja pretil gospođi Cvitić, siguran sam da to nije bil Ledo, koji se spominje ko njezin naslednik. I njega znam ko finog gospona, al ipak mislim da bi on ko pročelnik za društvene delatnosti bil polovično rešenje. Zakej? Pa, ono, društvene mu ziher jako dobro ide, al delatnosti su – sudeć po saborskom angažmanu – malo upitne.
[total-poll id=83700]